Arcebispo Metropolitana Dili Dom Virgílio do Carmo da Silva kuda hela ai-oan Mahoni besik iha Bee-Matan Dare. Foto: Thom.
SENOFA News, Dare– Arcebispo de arquedioceseano da Metropolitana de Dili, Dom Virgílio do Carmo da Silva husu ba Timor-oan katak ema ida-idak iha obrigasaun atu kuda ai-oan, iha zona desflorestasaun hanesan Dare hodi hamatak ambiente no proteze erozaun.
“Dare nu’udar fatin ne’ebé estratejiku tebes dezde uluk maske iha tempu bailoron nia sempre matak ba nafatin maibe ohin loron Dare hetan ameasa bo’ot ida husi impaktu desenvolvimentu infraestrutura hanesan: rehabilitasaun estrada, abitasaun umana ne’ebé komesa makas halo Dare ne’ebé uluk matak ho nia beleza natural komesa hetan estragu ba daudaun,” tenik arcebispo Dom Virgílio do Carmo da Silva, SDB ba jornalista sira hafoin partisipa serimónia kuda ai-oan iha Aldeia Sukalau, Suku Dare, Sábadu, semana liu ba .
Bispo Dili ne’e hato’o mensagen ba sidadaun Timor-Leste tenke proteje no kuida nafatin ai-laran tuan sira ne’ebé ezizte iha ita nia rai Timor ida ne’e hodi bele lori Timor-Leste ba nasaun ne’ebé matak ho nia beleza natural sira.
Lansamentu inisaitiva kuda ai-oan mai hosi Fundação São Paulo Diocese Dili (FSPDD) ho NGO RAEBIA Timor-Leste ne’ebé hetan apoiu masimu husi União Europeia (UE) hodi halo projetu “REFLORESTAÇÃO DE DARE”. Ai-oan suportasun husi Direção Floresta kuantidade rihun hitu atus ida (7100).
Tuir Diretor Fundação São Paulo, Pe. Augusto do Carmo Martins iha nia diskursu hateten “objetivu atu rekupera fila fali ita nia meio ambiente, liu husi kuda ai-oan ne’ebé hetan suportasaun masimu husi ita nia duador husi União Europeia (UE). Zona Dare sei dezenvolve sai fatin ‘ecoturismo’ no ‘eco farm’ atu hasa’e ekonomia komunidade Dare.
Partisipante sira mai hosi Eskola Sekundária katólika 5 no frater sira hosi Maloa, grupo kategorial hadomi ambiente, THS-THM no estudante UNPAZ, UNTL nomós Secretario Estado Meio Ambiente, Deometrio do Amaral de Carvalho. (REPORTER: ANO ALVES)
Estudante nain ha’at (4) husi Escola Secundária Católika Paulo VI ho kontente lori hela ai-oan Mahoni ne’ebé atu ba kuda besik iha Bee-matan Dare. Foto: Thom.