Jornalista Junior Hosi SENOFA Aprende Sai Jornalista Kriatividade

Jornalista junior Senofa hosi 10o ano Hasai foto hamutuk Instrutór JP, Thomas Ora, Fr. Lázaro Mendonça depoizde vizita knua STL. Foto: Dilson.

SENOFA News, Díli- Mehi sai jornalista la fasil tanba sai jornalista ne’ebé profisional tenke iha kriatividade. “Sai jornalista ne’ebé profesional tenke iha kriatividade, oinsá atu servi komunidade ho informasaun ne’ebé diak, aktual no jornalista tenke adapta ho teknolojia,”hateten Redpel STL, Godinho Barros wainhira jornalista junior senofa hosi 10o ano hala’o vizita ba knua STL, Kinta-feira (11/07/19).

Fr. Lázaro Mendonça ne’ebé partisipa iha vizita refere hatete katak Seminarista sira haree diretamente ho objetivu bele koñese diak liu tan média nia servisu, oinsá seminarista sira bele ganha tempu, fahe tempu. “STL (Suara Timor Lorosae) sai hanesan parseiro importante ba Senofa tanba tinan 4 ona koopeerasaun hamutuk ho STL sempre publika iha pagina ida. Ida ne’e mak ami lori seminarista sira aprende oinsá sai jornalista iha futuru,”dehan Mndonça.

Nia subliña tan katak iha seminário lor-loron la’ós seminarista sira nia atividade mak reza no estuda deit maibe afinal lae sira mós iha atividade extracurriculario seluk mak hanesan jornalizmu.

Iha biban ne’e mós Manazer produsaun STL, Joseph Koa hateten katak Jornalista nia servisu tenki kretivu atu fornese notisia ida ne’ebé diak hodi atrai sani-na’in. “Iha STL ne’e kada notisia ida nia fontes tenki tolu mínimu rua, katak la’ós ema ida nia hanoin deit mak koalia kona-ba asuntu ida maibé presiza mós fontes seluk ne’ebé iha relevante,”tenik Koa.

Cristilio Soares Barreto, aluno ida sente orgullu teb-tebes tanba foin primmeira vez hetan experiéncia foun. “Molok haree direta ha’u hanoin produsaun jornál ne’e buat fasil ida maibé afinal lae, ne’e buat defisil ida tanba presiza liu husi maneira oin-oin mak ita foin bele produz jornál ida que vale dunik no interesante dunik ba leitores sira,”katak Barreto. (Reporter: Dilson, Flavio)

Seminarista sira haree direta mákina (impresaun) STL ne’ebé akompaña husi grafika: Raimundo Moreira. Foto: Thom.