Ordenasaun Sacerdotal Pe. Carlito Teti-Laca iha Turiscai

Ordenasaun Sacerdotal Pe. Carlito Teti-Laca

ORDENASAUN SACERDOTAL- Arcebispo da Arquediocese Metropolitana Dili, Dom Virgílio do Carmo da Silva no Padre sira halao hela Rito Ordenasaun ba Padre foun iha Paroquia Nossa Senhora de Fátima Turiscai. Foto: Sandro

Senofa News, Turiscai- Arcebispo da Arquediocese Metropolitana Dili, Dom Virgílio do Carmo da Silva orgullu ba sarani Paroquia Nossa Senhora de Fátima Turiscai selebra existéncia ba dala 25 (Bodas de Prata) hodi hanoin hikas fali Kristu Nia presensa iha sira ida-idak nia leet. Tanba Turiscai-oan sai amu lulik nain 3 ona mak hanesan Pe. Guido Pereira (2016), Pe. Domingos Godinho (2018) no Pe. Carlito Teti-Laca (2019).

“Ne’e sinál konkreta mak ita haree ida ne’ebé agora iha ita nia oin ne’ebé hatan ona Maromak Nia bolu mak Pe. Carlito Teti-Laca. Ne’e mak sai hanesan sasin sarani Turiscai nia domin ba Maromak. Nune’e ohin ha’u bele haree ksolok ne’ebé sarani paroquia Turiscai sente wainhira simu grasa sacerdócio nian ho ksolok hodi hanoin hikas fali exitensia paroquia Turiscai ba dala 25,” tenik Arcebispo Dom Virgílio do Carmo da Silva, SDB iha nia humilia Sábadu, (09/11/2019).

Arcebispo mós hatutan tan katak Tinan 25 hanesan tinan esperansa ida, no tinan ida mós atu hanoin hikas fali grasa hirak ne’ebé sarani ne’e simu husi ita Nai’i Maromak, nune’e sarani paroquia ida ne’e sei la baruk no sei haruka nafatin gerasaun foun sira ba iha dalan ida ne’e atu haforsa nafatin sarani sira nia vontade hanesan Pe. Carlito Teti-laca ne’ebe reflete furak los iha ninia moto dehan “Buat ne’ebe, ba ita ema labele maibe, ba Maromak buat hotu bele deit,” hodi nune’e bele haburas nafatin sarani paroquia Turiscai nia vontade ka espiritu hodi haruka sira nia oan sira atu lao nafatin iha dalan Nai’i Maromak ninian

Oras dadaun ne’e Turiscai-oan sai seminarista Fatu-meta nain 4, Ano-Propedêdeutico Maloa nain 7, husi númeru ne’e mak nain 2 estagiado no estudo hela iha Senofa nain 7.

Iha fatin hanesan Pe. Carlito Teti-Laca hanesan Amo foun mós akresenta tan katak agradese ba Aman Maromak ba karan vokasaun ida be nia simu hodi halao iha nia moris nu’udar bibi atan ida ba ema hotu. “La haluha mos agradese ba familia, kolegas no ema hotu nia suporta durante lao iha dalan vokasaun. Ohin loron atan ha’u bele hamrik iha imi nia oin nu’udar bibi atan Nai Maromak nian hodi bele lori no haklaken Nai nia lian ba ema hotu. Grasa Nai Maromak nian sei suli mai ita hotu iha momentu saida deit tan ne’e ita tenki loke nafatin ita neon hodi nune’e ita bele simu Nai nia Grasa ba nafatin,” dehan Pe. Carlito Teti-Laca. (Reportagem: Sandro & Bendy).