“Moris Hanesan Viagem Ida Atu Hasoru ita Nia Mate”
Dom Virgílio do Carmo da Silva, SDB preside misa loron matebian ne’ebé akompanha mós Pe. Ângelo Salsinha, Pe.João Canissio, SJ iha sorin loos no Pe. Joaquim Sarmento, SJ no Pe. Ivo Hi Martins iha sorin karuk iha Santa Cruz. Foto king.
Senofa news, Dili- Arcebispo da Arquediocese Metropolitana Dili, Dom Virgílio do Carmo da Silva, SDB hateten Loron rua fulan Novembro loron matebian sira nian ita hanoin hikas fali hodi dehan obrigado no agradese ba maromak tamba haraik ona sira mai ita no ohin ita harohan ba maromak atu sira bele horik hamutuk ho Maromak iha ksolok rohan laek nian.
Arcebispo ne’e subliña tan katak moris ne’e liu lalais deit no temporario deit wainhira ita hahu moris iha rai ne’e, ita hahu kedas ona ita nia viagem ba hasoru ita nia mate. Ita nia moris hanesan bee ida ne’ebé suli liu deit la husik hela buat ida. “Moris ne’e la’ós ó nian no moris ne’e mós la’ós permanente. Mate mak mai husi moris, ita ema ne’e mai husi rai no sei fila ba rai,” dehan Dom Virgílio iha Rate Santa Cruz bainhira preside missa iha loron Matebian.
Reitór Seminário Nossa Senhora de Fátima Balide, Pe. Ângelo Salsinha mós hatutan tan ita ema moris iha mundo ne’e kuran buat barak maibé ita konfiansa iha Maromak ita sei la kuran buat ida. “Ita moris nu’udar peregrino iha mundo ne’e ita kuran buat barak kuran ba domin, justisa, lia loos, hahan hamrok isin no klamar ne’e mak realidade moris iha mundo maibé ema ne’ebé konfiansa iha maromak nia sei dehan Nai’i ha’u nia mahein ha’u la kuran buat ida,” hateten Reitor Senofa Pe. Ângelo Salsinha wainhira preside missa lokraik loron matebian iha rate Santa Cruz.
Almerio Borges, sarani katòlika ida mak partisipa iha loron matebian iha Santa Cruz hatutan katak sente haksolok tebes tamba loron ida ne’e hanesan loron sorumutu entre ema mate ho ema moris. “Moris dadaun ne’e ita iha Igreja peregrino no ita prepara an atu ba Igreja ida prugante no triunfante tan ne’e mate ne’e la’ós mate deit, maibé mate ida iha esperansa ba moris hias nian, ida ne’e mak ita nia fiar no mos entujiasmu maluk sarani sira nian ba loron matebian ne’e makas tebes hanesan ita hatene katak ida ne’e mak tradisaun igrerja nian ne’ebe hahu ona iha sekulo IV, no sai mos kultura Timor,”katak Borges. (Reporter D` jeam)
Foto:
Arcebispo da Arquediocese Metropolitana Dili, Dom Virgílio do Carmo da Silva fó hela bensaun ba sarani no ai-funan ne’ebé prepara husi sarani sira iha cemitério Santa Cruz, akompanha mós Pe. Ãngelo Salsinha. Foto: Thom.