Molok Tuir Exame 1º Periódo
Oficiál programa edukativu no guia turístika CNC, Flamina Belo explika hela ba seminarista sira kona-ba kronologia historia Timor nian. Foto. Ir. Arly
SENOFA NEW’S – Seminarista husi SENOFA halo estudu komparativu iha CNC (Centro Nasional Chega), uluk fatin antigo prizaun Balide harii tempu Portugal 1963, tanba ohin loron transforma sai hanesan sentru aprendizajen ne’ebé rai historia lubuk ida kona-ba prosesu luta ba libertasaun nasional. Seminarista hamutuk 27 ne’ebé akompaña husi mestre Thomas Ora hanorin Sosiologia no Fr. Leonildo de Araújo hanorin Historia lori estudante 11º ano/Ciência Sociais e Humanidade halo peskiza simples molok tuir exame 1º periódo (29 Marsu to’o 6 Abríl 2019).
Iha tinan 1974-1975 wainhira akontese konflitu politíku internu iha rai Timor, fatin ida ne’e partidu FRETILIN sira uza hodi kastigu apoiante ka militante husi APODETI no UDT. Tempu militer Indonesia hahu husi 1976 to’o Setembro 1999, konsidera hanesan prizaun oficial Indonesia nian ne’ebé mak kastigu dadur politíku TL ne’ebé uluk luta hodi kontra invazaun indonesia. “Maibé agora sai fatin aprendizajen ba jerasaun foun,”dehan Belo ba seminarista sira iha salaun CNC, Balide, Sesta-feira, semana rua liu ba.
Oficiál programa edukativu no mós guia turístika CNC ne’e, sente kontente no agradese basá tuir nia timoroan ne’ebé mak la hatene nia historia hanesan mos ai-hun ne’ebé la iha abut. Nia husu ba seminarista sira atu sai hanesan embaxador hodi hatutan ba ema seluk buat ne’ebé aprende no hatene ona.
Seminarista sira koko tama “cela nakukun” ne’ebé uluk tropas sira uza hodi detein dadur polítiku sira. Fatin ne’e hanaran hanesan ne’e tamba na realidade iha laran nakukun tebes mezmuke loron mós iha laran nakukun nafatin.
Entretanto fr. Leonildo hanesan manorin historia agradese ba CNC tanba bele simu ona Seminario nia pedidu hodi fó oportunidade ba seminarista sira atu aprende liu tan kona-ba historia Timor nian. “Ohin (15/03) ami mai iha CNC lori estudante hodi koñese di’ak liu tan realidade kona-ba sociologia no historia li-liu historia rai laran,”nia dehan.
Frater foin dahuluk vizita CNC, nia sente triste tamba iha media social ohin loron ema barak tarata nai ulun sira. Ida ne’e mak ema lahatene historia loloos. Constantinho Soares dos Reis, alunu ida sente orgullu tebes programa husi seminario tanba nia foin dahuluk vizita iha CNC. “Bainhira ha’u tama hodi koko experiensia iha ‘Cela nakukun’ laran ha’u foin hatene katak timor-oan ne’ebé uluk luta ba independensia rai ida ne’e terus duni,”katak Reis. (Reportagem:Ir.Arly & Ir.Deo)
Estudante ida sériu hakerek historia Timor.
Comments