Seminarista Halo Oratório ba Komunidade Santa Cruz

Komunidade Santa Cruz kontente foto hamutuk ho Seminarista sira hafoin oratório, Domingo (30/06/19). Foto: ony

SENOFA NEWS, DILI- Seminarista liu hosi Ano Preparatório (AP) halo oratório ba komunidade Santa Cruz ho objetivo atu guia labarik, juventude no parentes sira atu moris iha harmonia, paz. “Tinan ida ne’e Santu Padre husu ba Jovem Missionário sira, programa anual ba anu letivo tinan ida ne’e loke ho palestra ho tópiku Jovem no Igreja Missionária. Ida ne’e Missioanária nia konkretu implementasaun ba sosiedade ne’ebé hetan autorizasaun husi amu pároku. Programa ne’e diak ba labarik sira sei iha planu espailla iha sidade Dili tomak maibé ita hahu lai ho sosiedade sira ne’ebé mak basik hanesan sosiedade ne’ebé pertense ba parókia Balide nian,” tenik Pe. Ângelo Salsinha.

Komunidade Santa Cruz senti kontenti no apresia tebes wainhira seminarista sira halo programa oratório hodi halibur komunidade sira hodi fahe matenek no esperénsia hanesan kursu Inglesh, Portugés, Pintura, Piano, Guitar no formasaun espiritual, lectio divina. “Ami nu’udar inan-aman haksolok tebes ho programa husi Senofa ne’e hanesan sasukat no bukae ida ba ami nia suku no bairu ne’e. Ami mós agradese tebes ba Pe. Ângelo Salsinha ne’ebé konvoka ona programa ida ne’e hamutuk ho ha’u nia belun apostoladu orasaun sira ne’ebé realiza planu ida ne’e,”hateten Linda da Costa nu’udar zeladora no apostoladu orasaun iha bairu ne’e.

Nia mós akresenta tan katak ho formasaun espirítual lectio divina nian ami senti duni Na’i Jesus nia prezensa iha ami nia fuan no se wainhira Na’i Jesus la mai prezensa iha ami nia fuan, ami nia fuan sei tós ba nafatin no ami sei la senti buat saída mak iha ami nia moris lor-loron nian, maibé Jesus iha prezensa duni iha ami nia fuan no uja duni ami nia fuan mak ami senti saída mak ami hasoru iha ami nia moris no ami bele hatene saída mak akontese iha ita nia moris, tenik nia.

Joni Salsinha, seminarista AP ida hateten katak husi programa oratório ida ne’e mak oinsá atu halibur labarik sira no oinsa atu koñese no respeitu inan–aman, kolega no sosiedade no motiva sira oinsa atu aprende ko’alia iha eskola no ko’alia ho ema seluk. (Reportage: Diego & Fabio)