Seminário Menor Selebra Nia Existensia Ba Dala 65

Barak sai amu lulik no leigos serbi ba Nasaun e Igreja

Dom Basilio do Nascimento prezide missa iha Seminario Menor Nossa Senhora de Fatima Balide hodi selebra loron Nain feto nian no aniversario Seminario nian ba dala 65 iha kapela Senofa foin lalais ne’e. Foto: Maun Luis

SENOFA News- Loron 13 de maio sai hanesan loron aniversariu ba Seminário Menor Nossa Senhora de Fátima ne’ebe selebra tinan ba dala 65 existensia seminário Menor iha Timor.

“Dom Jaime Garçia Goulart kuandu hahu uma ida ne’e ou seminário ida ne’e, saida mak naton ne’e Dom Jaime hasoru hanesan problema, kuandu nia hahu loke seminario iha 1952, saida mak dom Jaime hare iha nia oin. Segunda guerra mundial foin hotu, nia foin sai bispo Timor nian liu tinan rua, Amu lulik la iha, kuadrus atu ba lori fiar la iha, ema ne’ebe nia hakarak atu bele haklaken Maromak nia liafuan la iha,” dehan Bispo Dom Basílio do Nasimento, iha homilia wainhira selebra misa iha kapela Senofa foin lalais ne’e.

Bispo Diocese Baucau ne’e mós hatutan katak iha momentu ne’eba araska liu, Dom Jaime liman mamuk, oinsá mak nia bele hatan ba uma kreda hodi hetan ema ne’ebé tulun bispo hodi haklaken Maromak nia liafuan, nune’e mak hamosu Seminário Menor Nosssa Senhora de Fátima ne’e. “Wainhira comunismu mosu iha 1917, Nossa Senhora mós mosu iha rai Fátima 1917, ne’e duni Dom Jaime nia ideia ne’e atu bele dehan ba dezafius oi-oin ne’ebe ohin mosu ne’e, hau hakarak harii uma ida ne’ebé bele forma ema sarani ne’ebé bele haklaken Maromak nia lia fuan habelar Maromak nia lia fuan, fo sasin ba Maromak nia lia fuan i iha grãu oi-oin hirak ne’ebé hakarak sai amu lulik bele sai amu lulik, hirak ne’ebé la sai amu lulik sai netik mestre pelo menus hetan formasaun diak atu sira bele kolabora iha uma kreda nia servisu,” haktuir Bispo.

Lider da igreja ne’e mos konvida seminarista sira atu bele hanoin problema saida mak ohin loron sociedade Timor foti ba uma kreda. “Imi iha formasaun ne’e buka identifika to’ok iha imi nia enkontru geral sira, imi buka to’ok hatene desafiu saida deit mak ohin loron iha ita nia Timor indenpendente no kreda ida ne’e hasoru, tamba imi mak aban bainrua sai kuadrus uma kreda nian, sai padre ne’ebe diak, matenek, santo, disciplina atu bele hanorin ema seluk,” katak Bispo. (Reporter: Ir. Jackson).