SENOFA HALA’O ESTUDU KOÑESIMENTU

Tinan millaun 50 liu ba rai Timor iha hela Tasi-okos

Foto hamutuk: Estudante sira husi 110 CT foto hamutuk ho Professora da disciplina Profa. Elvira Ximenses (karuk) no Sra. Sandra da Costa (loos) depois de hala’o estudu ne’e.(foto:Rio)

Senofa News, Dili– Estudante 11º ano (CT) husi ESC SENOFA hamutuk 24 hala’o sira nia Estudu Koñesimentu kona-ba Fossil no Formasaun ba Rai nian iha Xanana Reading Room, Sexta-Feira, (14/06/19).

Objetivu husi Estudu Koñesimentu ne’e atu aumenta tan kapasidade estudante sira nia koñesimentu kona-ba Fossil animal sira no mós historia ba Formasaun rain nian.

Professora Elvira da Costa Ximenes nu’udar manorin ba matreria Geologia nian hateten katak objetivu husi estudu koñesimentu ida ne’e atu oinsa hodi bele aumenta/kapasita estudante sira liu-liu iha área Fossil no historia Ba Formasaun Rai nian ne’ebé hetan iha materia Geologia rasik.

“Estudu Koñesimentu ba fosil sira ne’e importante tamba Fossil sira sai hanesan mata-dalan ida ba iha Geologista sira hodi bele hala’o sira nia peskiza kona-ba balada sira iha tempu uluk nian no mos kona-ba tinan ba Rai nian, idade da Terra,”Ximenes esplika

Iha sorin seluk Sandra da Costa nu’udar orientadora iha fatin refere hatutan katak tuir peskiza sira ne’ebé realiza ona Geologista no Paleontologu sira derskobre katak iha Tinan millaun 50 liuba rai Timor iha hela Tasi-okos ne’ebé depois de xoke malu entre Plaka Indo-Australianu ho Euro-aziatiku ne’ebé mak rezulta levantamentu ba rai Timor husi Tasi-okos mai iha rai maran no deskobrimentu ba iha Fossil husi Animal Mariñu balun hanesan “crinoide” ho idade liu husi 45 millaun liuba.

Melchior Sousa nu’udar estudante Senofa nia kontente tamba bele aumenta nia koñesimentu kona-ba materia Geologia liu-liu iha área fossil nian no mos kona-ba historia ba formasaun rai Timor nian. “Ha’u orgullu tebes tamba durante ne’e hala’o deit aprendigazem ho forma teorika deit,”katak Sousa. (Reporter Van Alves)

Professora Elvira Ximenes ne’ebé esplika hela imagem husi Mineral sira ne’ebé existe iha fatuk sira iha Xanana Reading Room.