SENOFA Tuir Certame Nível Nasional Reprezenta Munisipio Dili

Final- Eskola Sekundária 4 iha Município Dili compete iha final certame maka Senofa (kuana), São Pedro (karuk), 28 de Novembro (klaran) no Nobel da paz ne’ebé ho sériu rona perguntas husi konsellu juri, Abrão Pereira iha sala edukasaun Município Dili, Kinta-feira (22/08/19). Foto: Thom

SENOFA NEWS, Dili- Seminário Menor Nossa Senhora de Fátima (SENOFA) Balide, sai 1° lugar certame nível municipal hosi Eskola Sekundária Jerál/Tékniku Vokasional iha Dili hamutuk 25 hodi reprezenta Edukasaun Municipio Dili atu compete iha nivél nasiónal ho Monicípio 11 inklui RAEOA, hodi komemora loron Konsulta Popular ba dala 20.

Programa certame nível municipal realiza ona durante loron rua liu ba no nível nasional sei realiza iha loron 28 to’o 29 Agosto mai ne’ebé iniciativa diak husi CNC (Centro Nacional Chega) servisu hamutuk ho Ministéiru Edukasaun Juventude no Desportu. Iha certame refere matéria kona-ba história luta Timor iha tempu okupasaun nian hahu husi tinan 1974-2002.

Director da Educação Municipio Dili, Duarte Bragança apresia tebes programa refere bele sai hanesan sasukat ba estudante sira nu’udar gerasaun foun tenke hatene no kompriende história Timor nia. Nia agradese ba eskola hotu-hotu iha kapasidade tanba tuir kompete ona. “Ha’u hato’o parabens ba SENOFA tanba sai ona manán nain hodi representa Munisipiu Dili ba nível nasional,“dehan Director da Educação Municipio Dili ne’e.

Nia subliña tan katak importante husi atividade ida ne’e la’ós atu buka manán de’it, maibé atu hatudu ita nia kbi’it katak ita mós bele, tanba ita mós hamrik hanesan nasaun ida ne’ebé iha nia soberana. Tanba ne’e ita tenki orgulhu bo’ot nu’udar nasaun soberana ida. “Liu husi atividade ida ne’e bele kuda iha ita bo’ot sira nia hanoin, história ne’ebé mak ita nia heroi soberana sira rai hela mai ita,”tenik Bragança.

Virgílio de Araujo, nu’udar xefe komisaun nasional esplika ekipa téknika nasional husi Ministério Edukasaun desloka ona ba iha Municipio hotu-hotu inklui Raeoa hodi hala’o programa certame atu komemora loron Konsulta Popular ba dala 20. Programa ne’e bele lao diak tanba iniciativa CNC ho nível Municipal no Nacional.

Estudante hosi Senofa nain tolu maka Godinho Xavier (porta voz), Álvaro dos Santos no Jackson Maria da C. Ferreira. (Reporter Anio & Natureza)